Rotundus í Transylvaniu

a dance with dragons

2011-07-12T23:50:00.000Z

ó já, ég á eintak

my man godfrey

2011-07-10T22:23:00.002Z

ó, hó
svona myndir eru svo sannarlega ekki framleiddar í dag. ég tók greinilega rétta ákvörðun þegar ég ákvað að eyða tæplega 300 krónum til að svala forvitni minni.

Carlo: Very interesting book. The Greeks of the Middle Ages.
Cornelia Bullock: Oh, Irene would like that. You love the middle ages, don't you, dear?

sólavörn

2011-07-07T13:35:00.002Z

rétt í þessu rakst ég á grein á mbl.is þar sem sagt er að notkun sólavarnar geti verið skaðleg

http://www.mbl.is/frettir/taekni/2011/07/06/solarvornin_getur_verid_skadleg/

þetta finnst mér einkar athyglisvert.

ég hef einu sinni á ævinni notað sólavörn og þá brann ég í fyrsta skipti. eftir það tók ég ákvörðun um að ég skyldi aldrei aftur nota sólavörn. ég hef staðið við það og ekki notað sólavörn í yfir 10 ár. þess í stað hef ég passað mig að fara varlega út' í sólinni og klætt mig þannig að ég brenni ekki. það hefur reynst vel.

ég ætla ekk að halda því fram að ég hafi "predikað" í 10 ár að sólavarnir séu hættulegar - ég hef ekki get það. ég hef hinsvegar haldið því fram að maður geti byggt upp þol fyrir sól og geti sloppið við að brenna án þess að nota sólavörn. ég trúi því enn.

THOR

2011-07-06T21:13:00.003Z

það jafnast ekkert á við að sjá MARVEL Þór fljúgandi um á síðum teiknimyndasögubókar með Mjölnir í annarri og þessa fallegu rauðu skikkju blaktandi á eftir sér.

ekkert innihald

2011-07-04T20:10:00.004Z

PRED
|
|_SUB
|
|_XOBJ
|
|_OBL
---|_OBL
---|_ATR

captain morgan

2011-07-04T00:27:00.002Z

let's set sail with Captain Morgan and never leave dry land

greiningarkort

2011-07-01T16:20:00.002Z

á vef veðurstofu íslands er hægt að sjá greiningarkort fyrir landið.

ég þekki margt fólk sem lítur helst ekki á greiningarkort. mér finnst ég þó aldrei vita hvernig veður er úti nema með því að líta á kortið (tja... eða fara út og gá til veðurs).

á greinigarkortum eru línur (jafnþrýstilínur) sem segja til um loftþrýstinginn á hverjum stað fyrir sig. því þéttari sem línurnar eru á kortinu því hraðar fellur loftþrýsingurinn og því hraðar sem loftrþýstingurinn fellur því meiri vindur er á viðkomandi stað - ekki svo flókið!

á íslensku, vinsamlegast

2011-06-30T21:07:00.003Z

í stjörnuspánni minni á mbl í dag stóð eftirfarandi:
Þú ert með það á heilanum að fá vilja sínum framgengt

afskaplega þætti mér vænt um að einhver þýddi þetta yfir á hefðbundna íslensku. ég er nefnilega ekki viss um að ég skilji inntakið í þessari setningu.

eddukvæði

2011-06-29T18:39:00.003Z

ég hef hugsað lengi, langalengi, og komist að þeirri niðurstöðu að eddukvæði eru ekki alltaf mjög auðskiljanleg.

þetta hefur til að mynda valdið mér miklum heilabrotum
enn er verra, það vita þikkjumk, niðja stríð um nept
hér væri til dæmis ágætt að vita hvað nept er. er það sagnorð eða nafnorð? og er um forsetning eða uppfylliorð?

*dæs.

studium

2011-06-28T22:09:00.002Z

löngunin til að tala illa um eitthvað var mikil áðan. um hvað veit ég ekki en nú er löngunin hvort eð er horfin.

tilhneigingin til þess að greina þessar setningar samkvæmt reglum stigveldismálfræði er hinsvegar mikil.

Ólafur pái

2011-06-27T19:18:00.000Z

mig grunar að hann hafi verið Lannister:

"Ólafur gekk þá fram í stafninn og var svo búinn að hann var í brynju og hafði hjálm á höfði gullroðinn. Hann var gyrður sverði og voru gullrekin hjöltin. Hann hafði króksspjót í hendi höggtekið og allgóð mál í. Rauðan skjöld hafði hann fyrir sér og var dreginn á leó með gulli."

eitruð epli

2011-06-26T21:39:00.002Z

í dag las ég eitruð epli. hún [:: bókin] reyndist vera fljótlesnari og skemmtilegri en elsan mín ég dey. ég hef samt ekkert sérstakt um hana að segja. ætli hún falli ekki í flokkinn ég las hana.

allavegna. átakið mitt virðist ganga þokkalega. en ég er ekki bara að lesa íslenskar bækur. eins og ég nefndi í síðustu færslu þá kláraði ég fjórðu AGoT bókina í gær. í dag er ég að hugsa um að byrja aftur á fyrstu bókinni.

svo bíð ég spennt eftir að fyrsta þáttaröðin komi út á DVD. allra helst vildi ég hafa 10 klst aukaefni en við sjáum hvað setur...

valdatafl

2011-06-25T23:47:00.002Z

nú hef ég lokið við að lesa A Feast for Crows, fjórðu AGoT bókina.

ég hef heyrt að sumum finnist erfiðast að komast í gegnum þessa bók af þeim fjórum sem þegar eru út komnar. það mun vera sökum þess að í hana vantar persónur á borð við Dany, Tyrion og Jon Snow.

persónulega fannst þessi bók ekkert "erfiðari" en hinar en auðvitað saknaði ég þeirra sem ekki voru. þess vegnar er ég afskaplega fegin að þurfa ekki að bíða í mörg ár eftir næstu bók, hún mun vera væntanleg 12. júlí ef ég man rétt.

það eina sem mér finnst leiðinlegt við næstu bók er að nú er búið að breyta kápuhönnuninni :O( bækurnar sem á eftir koma verða sem sagt ekki í stíl við gömlu bækurnar mína. hrikalegt!

en... á meðan ég syrgi hvernig bækurnar hefðu getað litið út uppi í hillu, á meðan ég bíð eftir A Dance with Dragons og á meðan ég bíð eftir næstu AGoT þáttaröð er ég að hugsa um að skoða þessa síðu: http://www.dothraki.org/

orðabókin

2011-06-24T13:19:00.002Z

tölvan sem ég vinn á uppi á orðabók heir jar jar snigill. eftirnafnið er tilkomið vegna þess hve einstaklega "hröð" hún er í hugsun.

word-forritið í jar jar snigli er skráð á Árna Magg. ég velti stundum fyrir mér hvort það sé innanhúss brandari.

að uppgötva hjólið

2011-06-21T14:49:00.001Z

mér finnst að mótorhjól ættu að vera kölluð stálfákar

ég nota reglulega orðið hjólhestur yfir reiðhjól

ritmálsskráin

2011-06-20T10:56:00.003Z

kassi nr. S53 í ritmálsskrá orðabókar háskólans inniheldur orðið "skötustappa".

- ég hefði ekkert á móti því að borða skötu einhverja næstu daga.

einstaklega hættuleg

2011-06-19T18:34:00.005Z

ég held að móðir mín hafi brenglaða ímynd af mér. í fyrradag krafðist ég að horfa á conan og í gær á die hard. þá var sagt "voðalega ertu mikið fyrir vöðvastælta karlmenn" -en það er algjörlega ósatt. ég er það ekki. ég hef aldrei "fílað" schwarzenegger. svo vill bara til að hann leikur í conan sem er fantasíumynd, og mig langaði til að sjá hana.

hvað die hard varðar þá segi ég aldrei nei við góðri hasarmynd. ég hef nú séð fyrstu myndina u.þ.b. þrisvar. hinar myndirnar hef ég ekki séð (enda enginn alan rickman þar...). reyndar verð ég að viðurkenna að þegar ég var 12-13 ára þá var ég pínu skotin í bruce willis. unbreakable, the sixth sense og the kid voru mjög fínar myndir.

fyrir rúmu ári horfði ég á red. eftir að hafa séð hana setti ég mér það markmið að þegar ég kæmist á eftirlaun yrði starfsskýrslan mín stimpluð RED.

pabbi hefur ekkert á móti þessu kvikmyndavali mínu.

hestahvíslarinn

2011-06-19T01:35:00.002Z

ég hef aldrei skilið robert redford æði. ég horfði einungis á hestahvíslarann vegna þess að hún var á listanum mínum. myndin var svo sem allt í lagi. ekki alveg það sem ég vonaðist eftir en ég er þó a.m.k. búin að sjá hana. landslagið var sennilega það áhugaverðasta við hana.

þar til ég finn mynd sem ég leita að (Sp: að hverju ertu að leita? Sv: ég veit það ekki, en þegar ég finn það þá veit ég það) mun ég syngja með Tim McGraw (ekki upphátt, ég syng of falskt fyrir það)

here's to the corners yet to turn
here's to the bridges yet to burn
here's to the whole thing blown apart
It's open season on my heart

AGoT

2011-06-17T16:35:00.002Z

í gærkvöldi horfði ég á 9unda þáttinn af Game of Thrones og enn á ný voru eftirvæntingar mína uppfylltar. séð frá mínum sjónarhóli hefur HBO tekist einkar vel upp með þessa þætti og komið sögunni vel til skila. þetta er auðvitað sagt með það í huga að ég hef lesið bækurnar.

í flestum tilfellum eru persónurnar nákvæmlega eins og ég ímyndaði mér þær, en þó eru nokkrar undantekningar. bæði Ned Stark, Sam og Lord Walder Frey eru örlítið öðruvísi en ég gerði mér í hugarlund. ég get ekki sagt nákvæmlega hvað það er en það er eitthvað. samt get ég ekki kvartað. leikaravalið hefði vart geta verið betra.

besta valið á leikurum tel ég vera fyrir Lannister systkinin, Cersei og Jamie. Tyrion er ekki alveg eins og ég gerði mér í hugarlund en HBO fyrirgefst það þar sem hann er mun myndarlegri en ég ímyndaði mér. Jamie er aftur á móti NÁKVÆMLEGA eins og ég sá hann fyrir mér, í alla staði. Nikolaj Coster-Waldau tekst einkar vel að koma til skila öllum persónueinkennum hans. það hefði ekki verið hægt að gera betur. og svo er það Cersei. Lena Heady gjörsamlega 'ónar' skjáin þegar hún birtist. hún er algjör senuþjófur og maður hreinlega elskar að hata hana.

ég ekki annað sagt en að ég bíð spennt eftir að sjá síðasta þáttinn í fyrstu þáttaröð og svo eftir að ný þáttaröð verði sett í gang. -einnig: óskandi að þeir haldi áfram að láta ser Jorah vera í þessari opnu skyrtu...

bókafordómar

2011-06-16T18:40:00.004Z

í gær las ég íslenska bók, eftir konu. bókin heitir z ástarsaga og er eftir vigdísi grímsdóttur. þetta er ekki bók sem ég hefði valið til aflestrar, enda var það ekki ég sem valdi hana. hún var fengin mér í hendur sem hluti af persónulegu átaki mínu "lestu fleiri íslenskar bækur". það átak er aftur tilraun til að uppræta fordóma mína gagnvart íslenskum bókum

hvorki kápan, nafnið né bakkápuumfjöllunin vakti áhuga minn. ég kann yfirleitt ekki að meta ástarsögur (jane eyre er undantekning).

en jæja, ég las bókina - á einum degi. og mér fannst hún góð. ég er jafnvel á því að hún komist í flokkinn "ágætis afþreying" (skv. skemmtanargildis-flokkunarkerfinu mínu). til samanburðar þá er bridget jones í flokknum "glataður tími sem betur hefði farið í eitthvað annað". sense and sensibility er í flokknum "ég las hana" ásamt ljósaskiptum en pride and prejudice fellur mögulega í flokkin "afþreying" sem telst gott. reyndar telst allt frá "afþreying" og upp úr gott.

niðurstaða eftir lestur bókarinnar: z ástarsaga varð til að minnka fordóma mína (örlítið) gagnvart íslenskum bókum!

xta tilraun

2011-06-15T17:32:00.003Z

óskrifuð blöð hafa mér ávallt þótt heillandi. ég held það sé hvíti liturinn.

brrr

2011-01-10T14:57:00.001Z

litli málfræðingurinn

2009-10-18T14:48:00.003Z

enn og aftur er kominn tími til að blása lífi í þessa síðu, þó það muni ekki vara nema í örskamma stund. ég vildi nefnilega bara benda á nýja síðu, sem vonandi mun lifa lengur en eina bloggfærslu, en það er síða litla málfræðingsins.
www.litlimalfraedingurinn.blogspot.com
meira hef ég ekki að segja í bili.

múhahaha

2009-04-23T12:08:00.003Z

þessi síða er alveg dauð. - rétt eins og ALLAR aðrar heimasíður/bloggsíður sem ég hef sett á netið. eini munurinn er sá að þessi er enn á netinu :O/

en hver þarf svo sem heimasíðu þegar hann hefur facebook ?

2009-01-06T15:59:00.002Z

þessi síða lagðist í dvala yfir jólin. en nú fer skólinn að byrja aftur og þá ætti hún að lifna við...

mjög stutt

2008-12-21T21:05:00.003Z

skv. AÖ þætti sem ég sá um daginn (þáttur sem líklega er byggður á strúta-strípunum eftir Al Taliaferro) þá var það ekki Andrés sem gaf strútnum nafn. strúturinn hafði á sér merkispjald sem á stóð Hortense. mig grunar að þetta nafn hafi verið fengið lánað þegar mömmu Andrésar var gefið nafn.

að velja nöfn

2008-12-11T13:09:00.007Z

í gær datt ég í að lesa gamlar Al Taliaferro sögur og rakst þá á eina sem mér þótti mjög merkileg að mörgu leyti. í stað þess að endursegja söguna birti ég hana hérn fyrir neðan:

þegar ég sá nafnið á strútnum Hortense gjörsamlega sprakk ég úr hlátri. þannig vill nefnilega til að samkvæmt Barks-Rosa hefðinni heitir mamma Andrésar einmitt Hortensía (eða Sóley á íslensku). hvort þetta er algjör tilviljun, eða hvort nafnið hafi verið fengið að 'láni' frá strútnum (því þessi saga er eldri en allar Barks og Rosa sögur) veit ég ekki. en gefið það að Andrés sé sjálfstæð persóna sem á sér sögu og fjölskyldu hvað í ósköpunum hefur þá fengið hann til að nefna strút eftir mömmu sinni?

erfið orð

2008-12-09T20:37:00.003Z

ég var að hugsa um að hafa fyrirsögnina auglýsingar en þar sem ég á stundum í miklum erfiðleikum með að stafsetja þetta orð rétt ákvað ég að sleppa því. í raun á ég í sama vanda með orð eins og kvikmyndir , systir og systkyni. gallinn er sá að ég gleymi alltaf hvoru megin á að vera y.

hinsvegar ætlaði ég ekkert að tala um þetta í þessari færslu. ég ætlaði rétt að minnast á IKEA aulýsingarnar. ér ég eina manneskjan sem finnst furðulegt að segja IKEA með [I:] hljóði í stað þess að segja það með [i:] ? þessu hef ég verið að velta fyrir mér í nokkra daga.

furðulegt

2008-12-07T20:32:00.005Z

ég var að skoða bók á amazon. bókin hefur ekki enn verið gefin út og því stóð á síðunni This title has not yet been released en samt sem áður, ef maður skrollaði aðeins neðar á síðuna mátti finna eftirfarandi: Frequently Bought Together, Customers buy this book with... en þegar ég grenslaðist nánar um þá bók, þá var hún ekki heldur komin út. hvernig má þetta vera?

p.s. ég hef fundið hina fullkomnu jólagjöf handa mér. hún kostar ekki nema 1500 evrur. :OP

Mikki Mús

2008-12-07T12:54:00.003Z

ég hef aldrei verið neinn sérstakur aðdáandi Mikka Mús, ég hef alltaf kunnað betur við Andrés. reyndar virðast rosalega margir kunna betur við Andrés en Mikka en samt er Mikki 'tákn' fyrir Walt Disney.
it all began with a mouse er alltaf sagt í Disneylandi og lítið minnst á Andrés. það er reyndar alveg satt að stórveldið byrjaði með mús, en fáir vita að áður en Mikki varð til teiknaði Disney aðra persónu, kanínuna Oswald. ég man nú reyndar ekki hvaða ár það var en það var a.m.k. fyrir 1928, en það var árið sem Mikki Mús birtist fyrst. Mikki er sum sé orðin nokkuð gamall. hann hefur líka breyst mikið frá fyrstu myndinni, sem betur fer að mínu mati. í fyrstu myndinni má nefnilega sjá hann meiða dýr - jamm, ég er ekki að grínast - það virðist reyndar eiga að vera dálítið fyndið en er samt langt frá þeim Mikka sem við þekkjum í dag.

2008-12-06T20:28:00.002Z

eitthvað í þessa áttina eru mörg samtöl mín við bróður minn (hinn yngri)

bróðir minn: ég hef ekki verið allt of duglegur við að vakna.
ég: nei, en þú hefur verið mjög duglegur að fara að sofa.

jólin

2008-12-05T15:15:00.002Z

nú nálgast jólin. og nú má fara að huga að jólagjöfum sem þýðir að bráðum get ég farið að pakka inn.
það er ýmislegt sem mér finnst ekki skemmtilegt við jólin. t.d. finnst mér ekki gaman að skreyta, ekki gaman að setja upp jólaljós og ekki gaman að skreyta jólatré. hinsvegar finnst mér rosalega gaman að pakka inn gjöfum og reyndar líka að velja bækur til að gefa. verst er bara að það eru svo fáir í fjölskyldunni sem lesa e-ð.

prófatíð

2008-12-04T17:23:00.004Z

jebbs, það er satt. prófatíðin er aftur gengin í garð og henni fylgir mikil gleði. (ég er nú samt ekki viss um að allir séu sammála mér í þeim efnum)

ég hef verið að velta fyrir mér hvernig það myndi ganga að lesa allar AÖ sögur eftir Carl Barks í réttri tímaröð (þ.e. útgáfutímaröð). ég hef komist að eftirfarandi niðurstöðum:

a) útgáfutímaröðin er ekkert vandamál. ég veit hvar hægt er að nálgast allar sögurnar í tímaröð.

b) ef ég ætlaði mér að lesa þær allar í jólafríinu, segjum á svona 20 dögum, þá þyrfti ég að lesa u.þ.b. 32 sögur á dag.

c) ef ég ætlaði mér að lesa eina sögu á dag myndi ég klára þær á tæpum tveim árum.

d) svo má auðvitað skoða þá leið að taka einn dag í hverri viku og lesa, á þeim degi, tólf til þrettán sögur.

> það eru litlar líkur á að ég eigi eftir að lesa allar CB sögurnar í einum rykk - hinsvegar eru miklar líkur á að ég eigi eftir að lesa eitthvað af sögunum í jólafríinu, en það verður bara að koma í ljós.

2008-12-03T12:00:00.002Z

ég hef aldrei skilið fólk sem eltist við útsölur. lang flestir Íslendingar eltast vist útsölur (að því að mér virðist) og því hef ég aldrei skilið þessa lang flesta Íslendinga.

gærdagurinn

2008-11-30T16:19:00.003Z

jamm, þessi færsla er ekki um daginn í dag heldur gærdaginn, því í gær lá netið niðri hjá mér. af þeim ástæðum gat ég (augljóslega) ekki verið á netinu og eyddi því góðum tíma í að leita að bókinni Lof Heimskunnar eftir Erasmus. ég á þessa bók einhvers staðar en gallinn er bara sá að ég man ekkert hvert ég setti hana. auðvitað hyggst ég halda áfram að leita, því hvernig get ég lofað heimskuna ef ég hef ekki bókina?

Önd á ýmsum tímum

2008-11-24T16:27:00.003Z

einn af þessum minnisstæðu Andrés Önd titlum
-skyndilega grípur mig mikil löngun til að lesa þessa sögu.

2008-11-24T16:17:00.003Z

í dag var síðasti 'fyrirlestratíminn' í bókmenntafræði. ég spurði einnar spurningar í sambandi við söguhöfund í framhaldssögum. ég var beðin um að nefna dæmi og sagði því: ja, nærtækasta dæmið sem ég hef er Ævisaga Jóakims (Aðalandar).
það var hlegið.

ýmsir tímar

2008-11-22T17:44:00.004Z

bróðir minn minntist á það við mig fyrir nokkru að nú væri hann farinn að huga að eigin útför. hann hefur sum sé misst alla trú á stjórnvöldum etc... og íhugar nú að flytja til Danmerkur. ég held hann ætti bara að gera það. hann þolir hvort sem er ekki veðrið hérna.

seinheppni eða bara eitthvað allt annað...

2008-11-19T15:55:00.003Z

á síðustu teim/þrem vikum hef ég eytt miklum tíma í að leita að ákveðinni Andrésar Andar sögu sem ég las einu sinni. þessi saga mun vera byggð á Sögunni endalausu. eftirlanga og ítarlega leit á netinu komst ég að þeirri niðurstöðu að þessi umrædda saga hlyti að heita A Tall Tale eða En historie i historien (á dönsku). auðvitað fletti ég upp á hvar og hvenær þessi saga kom út og komst að, mér til sárrar gremju, að ég ætti ekki eitt einasta eintak af henni.

í morgun, þegar ég var að leita aö einhverri áhugaverðri syrpu til að lesa í strætó, rakst ég hinsvegar af tilviljun á þýska jumbóbók hjá mér. ég ákvað að fletta aðeins í henni til að sjá hvaða sögur væru í boði - og viti menn - þarna var sagan sem ég var búin að vera að leita að. reyndar hét hún ekki A Tall Tale eins og ég hélt heldur Abenteuer im Comicland (á þýsku) eða Historien uden ende (á dönsku) - ég hafð þá verið að leita að rangri sögu allan tímann! eftir að hafa síðan flett upp á í hvaða bókum þessi saga birtist komst ég að því að ég á hana líka í danskri útgáfu - og hugsanlega í tveim dönskum útgáfum.... ufff.... hvílík seinheppni.

dagur íslenskrar tungu

2008-11-16T20:02:00.002Z

ég hafði orð á því í gær við bróður minn að 16. nóvember væri orðinn næstumþví jafn mikilvægur fyrir mér og 9. júní. persónulega grunar mig að þessir dagar eigi eftir að verða álíka mikilvægir í framtíðinni en bróðir minn er annarrar skoðuna - hann heldur að 9. júní eigi alltaf eftir að verða mikilvægari.

eftir þessa umræðu velti ég fyrir mér hvort að nota enskuslettur 16.nóvember sé álíka mikil óvirðing og að horfa vísvitandi á Mikka mús teiknimyndir 9. júní.
þess skal getið að 9. júní er almennt talinn afmælisdagur Andrésar Andar

jólin koma ekki fyrr en í desember

2008-11-15T17:08:00.003Z

það er mikill misskilningur að jólaskraut snemma í nóvember kæti mann - að minnst kosti fyrir mitt leyti - þvert á móti verður maður hálf pirraður og kemst í fúlt skap. hvenær ætlar fólk annars að átta sig á að jólin byrja ekki fyrr en í desember?

annars á ég eftir að skrifa ritgerð - ég veit ég er óttalegur letingi. kannski það sé ástæðan fyrir því að ég er ekkert 'ofur' kát í dag - veit samt ekki.

ég var niðri í bæ ásamt mömmu í dag (ekki að mótmæla samt). fullt af fólki var á leiðinni niður í bæ gangandi með skilti og fleira... allt í einu sneri mamma sér að mér og sagði: sjáðu allt fólkið. það er örugglega á leiðinni niður á Austurvöll að fylgjast með mótmælunum.
svar mitt var eftirfarandi: ég geri nú ráð fyrir að þetta fólk sé að fara að mótmæla en ekki að fylgjast með mótmælunum.
stuttu seinna, þegar ég sá alla bílarununa, var mér hugsað til Latabæjarleikritsins þar sem allir íbúar Latabæjar mættu á fund á bílunum sínum í stað þess að ganga. ég hló innra með mér.

andafræði

2008-11-12T14:15:00.003Z

nú hef ég bætt inn mikilvægum tengli í tenglasafnið mitt -in anae veritas est-. þetta er tengill á Sydnordisk Akademi for Donaldisme og þar er hægt að nálgast margar áhugaverðar greinar um andafræði. ég mæli sérstaklega með einni grein sem einskonar 'innleiðslu' í þessi fræði en sú grein heitir Introduktion til bjørnologien og er eftir professor J.G.G. Jakobsen.

2008-11-12T12:57:00.002Z

áðan hélt ég mig hafa séð náunga sem ég kannaðist einu sinni við. ef þetta hefur verið hann þá þekki ég hann ekki lengur.

frændur okkar norðmenn

2008-11-07T16:25:00.003Z

hvað varð um umræðuna að taka upp norsku krónuna?
ég sem var farin að hlakka til að skrá mig í Gammel-Donaldismens Venner, sem er svipað félag og DDF(R) og kaupa norsk Andrés blöð í stað þeirra dönsku sem ég hef vanalega keypt. dönsku Andrés blöðin mín berast nefnilega ekki lengur til landsins. ég veit ekki hversu lengi þetta ástand mun vara en mér þykir þetta fremur leitt.

p.s. ég heyri stöðugt sírenuvæl fyrir utan hjá mér þessa stundina og velti fyrir mér hvað sé í gangi.

samviskan

2008-11-03T16:18:00.001Z

nú er hægt að kveikja ljósið á miðjum degin með góðri samvisku öfugt við á sumrin.

furðuleg samtöl og ýmislegt fleira

2008-11-01T16:39:00.002Z

áðan var ég að tala við bróður minn og hér er brot úr því samtali
ÉG: ég er eitthvað svo skrýtin í hausnum
BRÓÐIR MINN (YNGRI): ég hef nú alltaf vitað það

annars var ég niðri í bæ áðan og hvílík læti. ég get ekki sagt annað en að það hafi m.a. verið ástæðan fyrir því að ég flýtti mér heim aftur.

heija Norge

2008-10-31T10:16:00.002Z

hversu mikil snilld væri að taka upp nosku krónuna?
við myndum líta út eins og fullorðna fólkið sem hleypur alltaf heim í foreldrahús þegar eitthvað bjátar á.

ég styð þetta pottþétt :OD

mér þykir ég vera illa svikin

2008-10-29T08:29:00.003Z

já, og gott betur en það.
í sumar keypti ég eintak af DuckTales bók sem inniheldur framhaldssöguna Scrooge's Quest eftir Marv Wolfman. ég er einungis komin á þriðja kafla í sögunni en mér er samt hætt að lítast á hana. hugmyndin er góð en það eru allt of margar 'villlur' sem höfundur gerir sig sekan um. og þá er ég mest hneyksluð yfir því að hann skuli telja sig mikinn Carl Barks og Floyd Gottfredson aðdáanda og hunsa síðan stóran hluta af þeim hefðum sem þeir hafa skapað...
nei, nei, ég mæli hreint ekki með þessari bók og nú skal ég nefna nokkur atriði sem ég er ekki sátt með:

a) þegar Hexía kemst yfir happaskilding Jóakims veit hún ekki hvað á að gera við hann. hún segir t.a.m. í upphafi þriðja kafla 'once I figure out how to use it...' en bíddu nú við, er ekki eitthvað gruggugt við þetta? í fyrstu sögunni með Hexíu (útg. 1961) sækist hún eftir lukkuskyldingnum til að geta öðlast hið svokallaða Midas' Touch og þá veit hún hvað hún á að gera við skildinginn - bræða hann í Vesúvíusi...

b) eftir að Jóakim hefur misst happaskildinginn gengur allt á afturfótunum hjá honum. hér er gefið í skyn að skildingurinn hafi eitthvað með heppni hans að gera. þessi misskilningur hefur nokkrum sinnim komið fyrir en aldrei í jafn afgerandi mæli og hér. happaskildingurinn er einfaldlega fyrsti skildingurinn sem Jóakim þénaði fyrir eigin vinnu og hefur orðið honum innblástur og hvatning til að halda áfram.

c) eftir að Sibbu er rænt er Jóakim gjörsamlega yfirbugaður andlega. hann getur ekki hugsa, ekki stundað viðskipti og veit hreinlega ekki hvað á að gera. þetta virðist ekki líkjast þeim Jóakim sem við eigum að þekkja, honum sem aldrei gefst upp.

d) í öðrum kafla byggir Jóakim peningageymi úr bambusi á meðan verið er að laga hans venjubundna peningageymi. skyndilega byrjar allur bambus að grotna niður og Jóakim er kallaður út á bambusekrurnar sínar til að rannsaka málið. nær alla söguna er Jóakim að velta fyrir sér hvaða mikilvæga hlut hann hafi byggt úr bambusi. ég segi nú bara fyrir mitt leyti hversu líklegt er að Jóakim gleymi úr hverju peningageymirinn hans er byggður?. fyrir mér er það svona álíka líklegt og ég myndi gleyma á hvaða dögum Andrés Önd blaðið mitt kemur í búðir.

ég læt þessa upptalningu nægja í bili - ég hef ekki einu sinni lokið við alla bókina. ég er einungis búin að lesa 2 1/2 kafla.

þetta eru mikil vonbrigði :O(

orð

2008-10-27T17:39:00.003Z

er til sögnin að útfylla, sbr. að fylla e-ð út? eða er þetta út ögn eða e-ð svipað fyrirbæri? áðan heyrði ég nefnilega setninguna: að hjálpa honum að útfylla blaðið. ég veit ekki einu sinni hvort þessi senting ætti að vera 'leyfileg'. má kannski líka segja ég ætla að uppsetja kartöflur eða er sú setning kannski ekki sambærileg þeirri sem ég heyrði áðan?

ég bara spur

gott lesefni

2008-10-25T15:29:00.002Z

ég held að fólk hefði gott af því að lesa tvær eftirtaldar sögur eftir Carl Barks. sögurnar má finna sé farið í comics linkinn hér til hliðar.

Tralla La frá 1954

Isle of the Golden Geese frá 1963

þessar tvær sögur eru um margt merkilegar, sérstaklega ef haft er í huga að það var sjálfur Carl Barks sem skóp Jóakim og gerði hann að því sem hann er í dag. meira vil ég ekki segja um þetta í bili.

truflanir gæti orðið...

2008-10-21T16:32:00.003Z

stendur á Uglunni minni. ég sem hélt að truflanir væru í fleirtölu og sögnin ætti þar af leiðandi að vera í fleirtölu líka: truflanir gætu orðið...

ég leyfi mér að efast

þöglar myndir

2008-10-20T17:07:00.005Z

ég hef alltaf haldið að Ferðin til tunglsins frá árinu 1902 væri alveg stórkostleg mynd. hún er það alveg á sinn hátt en samt skil ég ekki ofankomuna á tunglinu, neðanjarðar sveppina og tunglbúana. ég man ekki eftir þessum hlutum í bókinni. hins vegar man ég eftir þegar þeir hentu dauða hundinum út úr byssukúlunni og hann fylgdi á eftir. þetta atriði þótti mér merkilegt.

blek

2008-10-16T13:54:00.003Z

ég legg það ekki í vana minn að sniffa af hlutum en ég verð að segja að það er ótrúlega góð lakkríslykt af blekinu mínu. verst er bara að í hvert skipti sem ég hyggst nota það þá vill dósin ekki opnast.
ég vildi bara ég vissi hvar blekhylkin væru svo ég gæti notað bláa blekpenna minn. ég komst nefnilega að því einu sinni að það er mun meira vesen að skrifa þegar maður þarf stanslaust að dýfa blekfjöðrinni ofan í blekdós, svo ekki sé talað um allan sóðaskapinn sem fylgir.

2008-10-16T13:27:00.003Z

það tekur alltaf tíu sinnum meiri tíma að gera leiðinleg heimaverkefni en skemmtileg.

pyrocumulus

2008-10-15T11:14:00.002Z

mig dreymdi að að tveir náungar hefðu kveikt elda hér og þar í Reykjavík. að sjálfsögðu ætlaði ég að nota tækifærið og festa pyrocumulus-ana á mynd. það gekk ekki vel þar sem ég hafði gleymt myndavélinni heima. ég fór og sótti hana, en þá voru reykskýin farin :o(

met

2008-10-14T16:25:00.002Z

loksins, eftir tvö ár og fjóra mánuði, hef ég lokið við að lesa bókina Needful Things eftir Stephen King. þetta er hreint EKKI besta bókin eftir hann sem ég hef lesið.
hugmyndin er góð, bókin er vel skrifuð og allt það en samt sem áður fannst mér hún, á heildina litið, ekki sérstaklega skemmtileg. :O(

merkilegt

2008-10-13T15:28:00.001Z

í gær áttaði ég mig á því að ég öfunda fólk sem hefur alist upp við ekkert sjónvarp.

ég fann aðra mynd!

2008-10-09T09:22:00.002Z

ég var að fara í gegnum myndir hjá mér og fann aðra mynd með tvöföldum regnboga :OD hann er mjög daufur, en glöggir einstaklingar ættu að geta fundið hann á myndinni.

regnbogar :OD

2008-10-08T15:57:00.003Z

um daginn sá ég tvöfaldan regnboga. ég gladdist mjög yfir að hafa tekið Hlunkinn með mér (stóru stafrænu myndavélina mína) en var aftur á móti mjög pirruð yfir því hversu langan tíma tók að hveikja á honum. þegar ég kom auga á regnboganna voru þeir mjög skýrir - þegar ég náði loks að taka mynd voru þeir næstum horfnir :O(

eins og sést á þessari mynd eru regnbogarnir MJÖG daufir, en þeir sjást þó.

það sérstaka við tvöfalda regnboga er að annar sýnir öfuga litaröð. dökka svæði á milli þeirra heitir upp á ensku Alexander's dark band, en ég er enn að reyna að finna út hvert íslenska heitið sé.

eureka!

2008-10-07T16:07:00.004Z

mér hefur tekist að búa til þrívíddamynd í photoshop :OD

auðvitað er ekki hægt að sjá myndina í þrívídd nema með svo til gerðum gleraugum. og ég ætla ekki að halda því fram að þetta sé fullkomin mynd.

nýja veðurfræði bókin mín

2008-10-04T23:33:00.001Z

hversu svalt er að skrifa veðurfæðibók og heita Storm?

fyrsti snór vetrarins

2008-10-02T20:23:00.002Z

bróðir minn (hinn yngri) heldur því fram að snjórinn sé vegna kælingar í hagkefinu.

kreppan

2008-10-01T21:13:00.001Z

í tilefni kreppunnar mæli ég með að fólk kynni sér teiknimyndina Scrooge McDuck and Money

kremkex

2008-09-30T12:33:00.000Z

brauðið mitt lyktar eins og kremkex frá frón

tungumál

2008-09-28T16:23:00.002Z

bróðurdóttir mín, 10 ára, heldur því fram að hún kunni öll orðin í ensku.
þegar eldri bórðurdóttir mín ( u.þ.b. 16 ára) var á hennar aldri þá sagðist hún kunna spænsku. í raun og veru kunni hún aðeins þrjú orð...

matador

2008-09-27T17:35:00.003Z

þegar ég var u.þ.b. 10-12 ára tók ég yfir alla Matador-þættina sem foreldrar mínir áttu. þetta var að sjálfsögðu gert með þeirra leyfi en samt sem áður fæ ég reglulega að heyra eitthvað í þessa áttina: hvernig datt þér í hug að taka yfir þessa þætti - ja, nú væri gaman að geta horft á Matador - ég skil ekki hvernig okkur datt í hug að leyfa þér að taka yfir þessa þætti - þú tókst yfir alla Matador þættina - o.s.frv.
Reyndar eigum við fyrsta þáttinn. Ég hef aldrei horft á hann og foreldrar mínir hafa ekki horft á hann aftur þrátt fyrir allar þessar ásakanir. ég hef líka stungið upp á að panta þessa þætti í gegnum netið og borga e-ð fyrir þá, fyrst þetta var nú allt mér að kenna, en ekkert hefur orðið af því. kannski þetta sé bara í nösunum á þeim...

i skovens dybe vilde ro - 1934

2008-09-25T09:42:00.005Z

þegar maður byrjar að lesa svona gamlar Mikka Mús sögur virðast þær kannski ekki vera svo mjög frábrugðnar frá þeim sem koma út í dag - en það hefur nú ýmislegt breyst sjá t.d. AA 26/2008: Kláus, Klara, Mikki, Mína og Plútó eru á leiðinni í tjaldferðalag
Klara: nu trænger vi til lidt musik, synes I ikke?
Kláus: uf, tog du den ækle tingest med?
Klara dregur upp upptrekkjanlegan plötuspilara
Mikki hrópar: jamen, Nora, du har jo kun den ene plade!

reyndar verð ég að segja að það sme kom mér mest á óvart er að Al Taliaferro og Floyd Gottfredson teiknuðu þessa sögu saman. einhvern veginn hafði ég gert ráð fyrir að Al hefði eingöngu teiknað Andrés Önd - maður er víst ekki alvitur og verður það aldrei

...dökkir hnoðrar hylja mjólkurrákir himinsins...

2008-09-24T16:03:00.004Z

húfan

ég málaði mynd
og myndin var af þér
og þú varst á myndinni með röndótta húfu
og húfan var litrík
en samt svo dauf
en þú gekkst glaður
þína leið

saltkjöt og soðkökur

2008-09-22T16:48:00.002Z

óaðskiljanlegir hlutir
það er ekkert varið í annað án hins :OD

vedur.is

2008-09-21T12:47:00.003Z

ég hef ekki skemmt mér svona vel síðan ég rambaði inn á vef Umferðastofu fyrir u.þ.b. tveim árum :OP

tilvitnun dagsins

2008-09-17T20:19:00.005Z

"Nogle gange var det bedre, hvis vi slet ikke kunne kommunikere med hinanden!"

Georg gírlausi Samtaler med hvaler AA 21/2008

um hita og önnnur mikilvæg málefni

2008-09-17T20:19:00.004Z

til er dálítið sem kallast sensible heat upp á ensku. íslenska þýðingin mun ekki vera skynsamlegur hiti eins og sumir gætu eflaust haldið, helur hiti sem hægt er að finna fyrir og mæla (eða e-ð í þá áttina).

til þess að mæla þennan sensible heat eru gjarnan notaðar þrjár mælieiningar: Fahrenheit, Celsíus og Kelvin. persónulega kann ég best við Celsíus, eins og flestir Íslendingar, en það er ekki bara vegna þess að ég er vön þeim mælikvarða heldur einnig vegna þess að það er skynsamlegt bil á milli frostmarks og suðumarks vatns á honum (100 °C). á Fahrenheit kvarðanum hins vegar eru 180 °F á milli -vatn frýs við 32 °F og sýður við 212 °F. - hverjum manni hlýtur að vera það ljóst að þessi kvarði er alveg út í hött. hvað ætli annars hafi fengið þennann Fahrenheit til að velja nákvæmlega þessar tölur? einhversstaðar heyrði ég að hann hefði miðað þetta út frá eigin stærð og e-m hlutföllum í sambandi við það en þá sögu sel ég ekki dýrari en ég keypti hana.

að lokum minnist ég á skemmtilegt lag sem getur ekki annað en komið manni í gott skap: Drinkin' Bone með Tracy Byrd

...Hey two plus two is always four
And down is south and up is north
Thirty-two degrees is freezing cold
You play with fire you end up burned
The early-bird gets the worm
But the only thing you really need to know
Is...

tölvur

2008-09-09T16:42:00.002Z

tölvur í dag gera ekkert annað en að safna drasli. þegar ég fékk mína tölvu -það eru orðin nokkur ár síðan- þá var hún stærsta tölvan á heimilinu með tæplega 40 gígabæta diskaplássi. ég hélt að ég myndi aldrei nokkurn tíman nota meira en helminginn af þessu geymsluplássi en einhvern fór ég að því að fylla hana. þess vegna tók ég mig til í fyrradag og henti öllu rusli út af henni. áður en ég byrjaði átti ég rétt um 3 gígabæt laus (ég var þegar búin að losa mig við hluta af draslinu) en núna, þegar ég hef næstum lokið mér af, á ég tæplega 8 gígabæta laust pláss undir meira drasl :OD
en þó tölvan mín sé orðin nokkurra ára gömul og innihaldi fullt af drasli þá er hún ennþá hraðasta tölvan á heimilinu (tja kannski fyrir utan tölvuna hans bróður míns). persónulega held ég að það sé vegna þess að hún er ekki nettengd - ég hef þver neitað að nettengja hana og mun gera það áfram. ég ætlast líka til að þessi tölva dugi mér í a.m.k. 2-3 ár í viðbót :OP

makríls himinn

2008-09-06T19:12:00.003Z

cirrocumulus stratiformis undulatus er ekki jafn flókið nafn og það virðist vera. mér veitist jafnvel auðveldara að þekkja cirrocumulus stratiformis undulatus heldur en mörg önnur skýjaafbrigði. þó er ekki ýkja erfitt að bera kennsl á skýið sem þekur himininn akkurat þegar þetta er skrifað: altostratus _ _ ég þori samt ekki að segja til um hvaða afbrigði af altostratus þetta er, því miður.

endalaus stratus

2008-08-22T11:00:00.002Z

nú hef ég lokið mínum skammti af sumarvinnu í sumar. ég verð að segja að þessi vinna sem ég var í var hreint alveg ágætis vinna. til að mynda hef ég lært að setja upp sandblástur, búa til skilti og merkja bíla - ekki leiðinlegt!

í gær var fyrsti frídagurinn minn og því skrapp ég niður í bæ með frænku minni á stóra gula bílnum. það besta við gærdaginn var þó að ég keypti mér íslenska orðsifjabók :OD - og bók um veðurfræði :OD .... það er aldrei að vita hvað maður gerir í dag...

annað í fréttum er að Hafna- og mjúkboltafélag Reykjavíkur (skammstafað HMR) er komið með nýja heimasíðu sem er klikkaðslega flott!!! ég mæli með því að allir sem lesi þetta kíkji á síðuna: www.hafnabolti.com - og auðvitað vona ég að sem flestir skrái sig í félagið.

mikilvægar dagsetningar?

2008-08-08T17:20:00.002Z

mér hefur verið sagt að í dag sé áttundi áttundi 2008 (08-08-'08)
og ég ætla ekki að gera neitt sérstakt í því tilefni...

klósigar

2008-07-29T22:52:00.001Z

ekkert jafnast á við klósiga...

vandræðalegar þagnir...

2008-07-28T20:58:00.001Z

... eru allstaðar... samt finn ég enga í augnablikinu.

skýjamyndir

2008-07-23T17:36:00.001Z

Danmörk

2008-06-01T06:36:00.003Z

já, það er rétt, ég er í Danmörku. veðrið er alveg brjálæðislega gott tuttugu og eitthvað stiga hiti og sól. svo spillir auðvitað ekki fyrir að í gær fór ég á komiks og fékk eiginhandaráritun frá Freddy M. og Byron E. svo sá ég líka Don Rosa og gekk í DDF(R). ég mun að sjálfsögðu fara aftur á staðinn á eftir og reyna að fá áritun hjá Don R. og Cavazzano.

ég ákvað að hafa fyrirsögn á þessari færslu

2008-05-27T15:17:00.003Z

nú loksins er rúmlega mánaðar prófatörn lokið.
ég efast um að nokkur trúi því hversu fegin ég er.
en samt...

2008-05-26T17:19:00.004Z

Helgakviða er ekki uppáhaldið mitt - en hún er heldur ekki leiðinleg

þessa eftirfarandi vísu kalla ég: lært undir próf

innantómir dagar
áfram líða
láta alla
lengi bíða
andvarpa þungan
lesa meira
um vopnaþyt
langa geira
ég get ekki meira.

hálfgerður leirburður :OP

hljóðritun

2008-05-14T20:46:00.002Z

ég veit ekki hvort ég hef sagt þetta áður, en mér finnst ótrúlega fyndið að hljóðrita orð á límbandsrúllur.

óvirkur bloggari

2008-05-13T21:35:00.001Z

hljómar eins og óvirkur alkahólisti.

uhu = aha

2008-05-13T13:10:00.006Z

í strætó 28 hékk uppi þýskt strætókort með númeruðum stoppustöðvum. ég dreg þá ályktun að strætisvagninn hafi verið keyptur frá Þýskalandi.

ekkert að frétta

2008-05-12T16:18:00.003Z

Macbeth er ekki skemmtilegasta leikrit sem ég hef lesið. þó er það mun skemmtilegra en Death of a salesman - þegar ég las það leikrit var ég að drepast úr leiðindum. ég hef aldrei nokkurn tíman lesið jafn leiðinlegt leikrit, meira að segja Under Milwood var mjög skemmtilegt í samanburði.
maður fær víst ekki alltaf að velja það sem maður les :O( sem minnir mig á það að ég var að skrifa niður titla á nokkrum bókum sem ég var að hugsa um að lesa í sumar. ég hef ekki lesið neitt af viti síðan ég lauk við Dark Tower seríuna í þriðja bekk MR. ég ætla að kenna Menntaskólanum um þetta... ;OP

framtíð mín

2008-05-09T20:00:00.003Z

öll samtöl mín í framtíðinni eiga eftir að vera jafn innihaldsrík og í The Babbit and the Bromide. persónulega finnst mér útgáfan með Fred A. og Genen K. alltaf mun betri en þessi með Fred A. og systur hans Adele A. alltaf hlæ ég að þessum snillar brandara sbv. Ritu og Ginger.

Harrius Potter

2008-05-08T11:47:00.003Z

ég er ótrúlega slolt af mér. í gær lauk ég við fyrsta kaflan í latnesku Harry Potter bókinni minni. ég ætla ekki að segja að ég hafi skilið allt en samhenginu náði ég ágætlega og svo lærði ég líka nýtt orð: birotula automataria sem mun vera mótorhjól. birotula er samansett úr forskeytinu bi (sem þýðir 2) og orðinu rota (sem þýðir hjól). ég geri svona fastlega ráð fyrir að automataria sé e-k sjálfrennifyrirbrygði.

tetris snilld

2008-05-07T22:03:00.004Z

ég viðurkenni það, ég er mikill aðdáandi tetris. uppáhalds útgáfan mín er game boy leikurinn frá 1989. ég komst samt fyrst að því í dag að til eru snilldar tetrismyndmönd á youtube. til dæmis þetta. ég skil ekkert hvað gaurinn er að segja en samt finnst mér þetta ótrúlega fyndið. svo er líka hægt að finna tetris lagið. og síðan nýja útgáfu af tetris laginu.

ég er að hugsa um að vera tetris kubbur næsta öskudag. er einhver sem vill vera með mér?

facebook

2008-05-07T12:37:00.001Z

er tímaþjófur

niðúbsí

2008-05-06T23:40:00.002Z

ég fór í ísbúðina áðan og fékk mér ís. nú velti ég fyrir mér merkingu orðsins niðúbsí, sem greinilega má lesa á innanverðum gluggunum í ísbúðinni...

annað:
ég er búin að fá útskriftarfötin mín. alveg snjóhvít :0D mjög fín og alveg smell passa, enda sérsaumuð :0P

vale, lingua latina - *snökt

2008-05-06T17:30:00.006Z

nú þegar sakna ég latínu. ég trúi ekki að þetta sé búið, að ég muni ekki sitja aftur í tíma hjá Kolbrúnu. ég veit ekki hvernig ég á að bregðast við þessu, en ætli tilfinningin sé ekki sama og í Catullusarkvæðinu odi et amo. (ég vona ég fari rétt með eftirfarandi línur:
odi et amo quare id faciam fortasse requires
nescio sed fieri sentio et excrucior
(í þýðingu: ég elska og hata þú spyrð eftilvill hvers vegna, ég veit það ekki en ég finn það gerast og ég þjáist).
það er ekki að ég elski og hati, heldur meira fegin að þetta sé búið en vil samt ekki hætta.

þessi latína er farin að hafa of mikil áhrif á mig. um daginn, þegar ég var að lesa um Daedalos og Icarus var ég næstum farin að gráta þegar ég var komin að hlutanum þar sem sólin hafði brætt vaxið og Icarus reyndi að blaka nöktum handleggjunum en náði ekki nokkurri loftmótstöðu og féll niður í hafið. og svo þegar minnst var á föður hans, sem var ekki lengur faðir, þar sem hann hrópaði nafn Icarusar or sá vængina í öldunum. mjög sorglegur hluti...

en alla vegana ég var í munnlegu latínuprófi í dag og þá dró ég bút úr Ovid. ekki samt um Icarus heldur um Dafne og Apollo. ég held það hafi gengið ágætlega, þó ég hefði mátt geta sagt eitthvað meira um skáldið sjálft og verk hans. Ovid var þó mun álitlegri kostur en miðaldarlatínan sem mér stóð til boða. allt er betra en miðaldarlatína og Cicero.

Öndverði gullhvatinn

2008-05-05T13:20:00.003Z

þar sem ég átti mjög erfitt með að sofna í gær dró ég fram gamla syrpu (nr.32) og las söguna: Öndverði gullhvatinn. einu sinni taldi ég mig skilja þetta heiti fullkomlega, sérstaklega vegna útskýringarinnar í sögunni, en nú klóra ég mér bara í hausnum. öndverði hvað...
hinsvega skemmti ég mér yfir hinum furðulegustu nafngiftum í sögunni, hér eru nokkur dæmi:
AF-DAHLABAD - borgin sem goðsagnir herma að Öndverði gullhvatinn hafi orðið til.
ARABISTAN - landið sem AF-DAHLABAD er í, ég geri ráð fyrir að það sé arabaland.
SELIM-AL-HORRIM - sá sem átti að hafa skapað Öndverða gullhvatann.
JÚSSÚF UPP-STÚFUR - leiðsögu maður á safninu í ARABISTAN.
SULTAR SEYRUH - æðstiperestur sem átti að hafa gert Öndverða gullhvatann.
HÁVI - gaur á móti peningum.

best af öllu var þó þegar Jói Rokkafell labbaði út af veitingarstað sem seldi þjóðlega rétti og sagði Aaa! Sviðakjammarnir spilltu ekki á hátiðarstundu!. Fyrir utan veitingarstaðinn blakti ítalskur fáni.

... samt sem áður finnst mér þetta alltaf skemmtileg saga, þó kannski ekki eins skemmtileg og margar aðrar...

acc. cum inf. (þolfall með nafnhætti)

2008-05-03T19:18:00.003Z

það er ekki nóg með að ég sé farin að nota gen.partit. í daglegu máli heldur kemur stundum upp úr mér partic.perf. og jafnvel acc. cum inf.

þetta er frekar bagalegt, og það versta er að ég tek stundum ekki eftir því.

uss... fuss... latnesk áhrif...

hver stendur fyrir þessu?

2008-05-01T19:50:00.001Z

ég held að það sé ekki tilviljun að Anaxímandros og Anaxímenes heiti mjög ruglandi nöfnum.

sumarið byrjar vel

2008-04-28T13:08:00.004Z

það sem af er degi hef ég fangað tvær hunangsflugur inni hjá mér og úr því að ég er svo einstaklega góð manneskja sleppti ég þeim út á svalir.

vonandi koma þær aldrei aftur.

óheillandi orð

2008-04-27T20:52:00.002Z

þar sem ég hef eytt öllum deginum í að lesa fyrir sögupróf nenni ég hvorki að minnast á námsefnið né prófið í þessari færslu. hinsvegar lagar mig að minnast á hversu ófagurt mér þykir enska orðið ornament.
um daginn, þegar ég var stödd úti í bókabúð, rak ég augun í bók sem bar nafnið The Function of Ornament og samstundis hugsaði ég með mér: þetta er eitt af ófríðari orðum í enskri tungu sem ég hef nokkurn tíman heyrt/séð. það jaðrar jafnvel við að það falli í flokk með orðum eins og clown. trúðar finnast mér ekki svalir, en íslenska orðið trúður er að minnsta kosti fallegra en orðið clown.
ornament finnst mér aftur á móti minna á Ariel Black skrift sem ég tengi vanalega við svarta ljóta klessu á hvítum pappír. ornament getur líka hljómað kynferðislega, eða minnt á valdafíkn. ég held að ljótleikinn felist í r n m hljóðunum. annars benti bróðir minn (hinn yngri) mér á hugsanlega ástæðu fyrir því að mér þykir þetta svo ófagurt orð. honum datt nefnilega í hvort Bretar væru kannski með svo ljótt skraut hjá sér.

13 próf eftir

2008-04-26T20:04:00.002Z

einhvers staðar heyrði ég einhvern tíman að þeir sem blístruðu eða hummuðu á förnum vegi væru kúkú...

ég blístra á hverjum degi.

óskipulag

2008-04-25T12:36:00.002Z

þetta verður fyrsta árið sem ég nota ekki blekpenna í íslenskuritgerðarprófi (langt orð). ég finn hvergi blekhylkin.

ánægjulegt kvöld

2008-04-24T11:00:00.004Z

í stað þess að horfa á sjónvarpið og lesa latínu eyddi ég gærkvöldinu í spjall við eiginkonu vinar pabba, en foreldrar mínir buðu þeim í mat í gær. við spjölluðum meðal annars um Kalevala, merkingu íslenskra og enskra orða, aðferðarfræði og margt fleira, og ég get ekki sagt annað en að mér hafi þótt þetta mjög skemmtilegt. að minnsta kosti fór ég ekki að sofa fyrr en hálf fjögur í nótt.